President Bola Ahmed Tinubu don nominate Dr. Bernard Mohammed Doro from Plateau State make e join him cabinet as Minister of the Federal Republic of Nigeria.
The matter bin happen on Tuesday as Special Adviser to the President on Information and Strategy, Bayo Onanuga, drop statement wey confirm say Tinubu don send Doro name go the National Assembly.
For the letter wey reach Senate, Tinubu beg the lawmakers make dem screen and confirm Dr. Doro to fill the Plateau State ministerial slot wey don empty since Professor Nentawe Goshwe Yilwatda become APC National Chairman for July.
Before Yilwatda move go head APC, he don serve as Minister of Humanitarian Affairs and Poverty Reduction.
Dr. Doro wey dem born for January 23, 1969, for Kwall area inside Bassa Local Government of Plateau State, get more than 20 years experience for health, management, and community work – both for Nigeria and for abroad.
The man na correct professional wey hold degrees for Pharmacy and Law, plus MBA wey focus on IT and business strategy, and another Master’s degree for Advanced Clinical Practice.
E don also work for the National Health Service (NHS) for United Kingdom as Independent Prescriber and Advanced Clinical Practitioner, where he serve for emergency units, walk-in centres, general hospitals, and clinics.
Apart from im medical and management work, Dr. Doro don dey help plenty youths for mentorship and empowerment programs, both for Nigeria and the diaspora.
If Senate confirm am, Doro go join Tinubu team as one of the new ministers wey go help push government work forward.
