Imo State Govnor wey be Chairman of Crude Oil Theft and Management Committee, Senator Hope Uzodimma, don talk say the committee dey work hand-in-hand with NNPCL and NUPRC to boost crude oil production for Nigeria.
Uzodimma yarn dis one for Abuja after dem hold closed-door meeting with govnors from oil-producing states, big officials of Nigerian National Petroleum Company Limited (NNPCL) and the Nigerian Upstream Petroleum Regulatory Commission (NUPRC).
According to am, di target na to raise crude oil production reach three million barrels per day, as President Bola Tinubu don already set.
“Na yesterday National Economic Council ask us give update on crude oil theft and prevention. From wetin we see, production dey go up small small because of the effort wey security agencies, oil industry people and state govnors dey put together,” Uzodimma talk.
E still add say Friday meeting na to hear briefing from the new oga dem wey dey lead NNPCL and NUPRC.
“We dey satisfied with wetin dem present and their work plan. The committee go still dey engage them more so that our strategy go match to help Nigeria hit the 3 million barrels per day mark,” e add.
Uzodimma still hail President Tinubu for the reforms wey he don carry for oil and gas sector, talk say e don dey show better result already.
The hope now be say with all the collaboration between govnors, oil companies and security bodies, Nigeria go fit reduce crude oil theft well well and also make the country strong for world energy market.
— TheStreetNewspaper
