Fuel wey Nigerians dey enjoy steady fit soon vanish as gbege don start between Dangote Refinery and petroleum workers union, NUPENG.
For statement wey Comrade Williams Akporeha and Comrade Afolabi Olawale sign for Abuja on Friday, NUPENG accuse Dangote Refinery say dem dey run anti-labour waka wey dey kill the survival of Petroleum Tanker Drivers (PTD).
Union Para Say Dangote Wan Ban Drivers From Join Union
The kasala burst as Dangote management talk say drivers wey go operate their 10,000 Compressed Natural Gas (CNG) trucks no go fit join any trade union.
NUPENG call am big slap to Nigerian Constitution and international labour law wey Nigeria don sign since 1960. Dem even talk say drivers wey MRS (Dangote cousin, Sayyu Dantata company) dey recruit don dey forced to sign paper say dem no go join union.
Union yan say Dangote dey try monopolise fuel distribution, crush competition, and turn workers to slaves — wey go later make fuel price high for ordinary Nigerians.
Strike Threat Don Dey Ground
NUPENG don talk say if government no put leg for ground, Petroleum Tanker Drivers go stop work from Monday, September 8, 2025, and that one go cause fuel wahala across Naija.
Dem call on Nigerian Midstream & Downstream Petroleum Regulatory Authority (NMDPRA) to use Petroleum Industry Act (PIA) power take stop Dangote from abusing him market power.
Union Send Word Give Nigerians
NUPENG beg Nigerians make dem bear any wahala wey fit come from strike, say the fight na for justice and dignity of workers.
“Naija no be lawless country. We no go gree make trillionaires turn workers to slaves,” the union warn.
