TheStreetNewspaper report say Trade Union Congress of Nigeria (TUC) don vex seriously as Federal Government dey plan put 5% tax on petroleum products. Dem don warn say if government no cancel am sharp-sharp, nationwide strike go follow.
Inside one strong statement wey TUC drop for Lagos on Monday, dem describe the plan as “economic wickedness”against Nigerians wey already dey suffer fuel wahala, food inflation, and collapsing naira.
The new tax wey President Bola Tinubu sign inside Nigeria Tax Administration Act on June 26, 2025, go touch petrol and diesel — whether na import or refinery fuel. But e no go affect cooking gas, kerosene, renewables and CNG.
But wahala dey! Stakeholders dey shout say the surcharge go push fuel price pass the current N950 per litre, wey don already rise 382% from the N197/litre wey Tinubu meet when he enter office 2023.
Petroleum Products Retail Outlets Owners Association warn say many filling stations fit close shop if government force am. Policy analysts sef tag the plan anti-people.
TUC national president, Festus Osifo, and secretary general, Nuhu Toro, talk say:
“Workers never recover from subsidy removal, food price don scatter, dollar dey chase naira up and down. To add new 5% tax go just kill Nigerians finish. We no go gree!”
The union talk clear say if FG no cancel the levy, dem go mobilise workers, civil society, students, markets, churches, mosques, and everybody for massive protest wey fit paralyse the country.
“Enough is enough! Nigerians deserve economic justice, no be endless punishment,” TUC thunder.
For now, TUC don direct all dia state councils and affiliates to dey alert, ready to move once FG insist to go ahead with the plan.
 don reject Federal Government 5% petroleum tax plan, call am economic wickedness. The union warn say nationwide strike dey on top table if FG no withdraw the policy.){kind=link}