igeria don start one of di biggest vaccination waka wey di country don ever do before, to protect about 106 million pikin dem from measles, rubella and polio. Di campaign go join different vaccines and child health services together for one big movement to reach pikin dem everywhere for di country.
Dis nationwide campaign go cover pikin dem from 0–14 years for measles and rubella and 0–59 months for polio. Di operation go happen for two stages: Phase 1, wey start today, go cover 20 northern states and Oyo State, while Phase 2go begin for January 2026 for di remaining southern states.
Health workers go waka round with fixed centres, outreach points and house-to-house “sweep teams” to make sure say even pikin dem for bush and far places no go miss out.
Apart from di main vaccines, di programme go also give routine immunization, malaria prevention, and treatment for neglected tropical diseases, all join, to support Nigeria “Primary Health Care Under One Roof” strategy.
Minister of Health and Social Welfare, Dr. Ali Pate, hail frontline health workers say, “Una dey do great work for this country. Vaccines dey safe, and dem dey save lives. Make every parent join hand make sure say their pikin collect their dose.”
Dis big campaign follow di success of di smaller vaccination rounds wey happen between August and September 2025for 11 northern states, where dem reach 3.1 million pikin, give nutrition supplement to 500,000 and anti-malaria drugs to 150,000.
According to Dr. Mohammed Janabi, WHO Regional Director for Africa, “Nigeria’s integrated plan na example for di whole continent. As we dey unite against measles, rubella and polio, Africa dey move closer to where no pikin go suffer or die from preventable disease again.”
Government and partners like WHO, UNICEF, Gavi, Rotary International, Gates Foundation, and Africa CDC don put better structure for training, logistics, payment and data collection to make sure di campaign run smooth and transparent.
Di new combined measles-rubella vaccine wey dem go use go replace di old measles-only version, because both sickness fit cause wahala for pikin and pregnant women.
