ECOWAS don suspend Guinea-Bissau from all im activities afta soldiers use coup take scatter di democratic process wey happen for di country on November 26, 2025.
Di suspension dey inside di communiqué wey ECOWAS Mediation and Security Council release afta dia emergency meeting wey all West African leaders attend.
ECOWAS para well-well for di coup, call am “bad attempt to spoil democracy,” and demand make di military return Guinea-Bissau to constitutional rule sharp-sharp.
Di regional body don also set up big Mediation Mission wey President Julius Maada Bio of Sierra Leone go lead. Di team go include President Faure Gnassingbé of Togo, President José Maria Neves of Cabo Verde and President Bassirou Diomaye Faye of Senegal, plus di ECOWAS Commission President.
ECOWAS still demand make di army release all di civilian leaders wey dem detain and allow di National Electoral Commission announce di November 23 election results without wahala.
Di organisation warn say e no go gree any arrangement wey go give legitimacy to di coup or block di will of di people.
