National Youth Service Corps (NYSC) don extend di online registration for 2025 Batch ‘C’ mobilisation by 48 hoursbecause of network wahala wey don disturb plenty Prospective Corps Members (PCMs).
For statement wey Caroline Embu, NYSC Director of Information and Public Relations, release on Friday, she talk say di delay wey some people dey face for di portal na because network don slow down di system.
According to her, “Management don see di challenge wey plenty PCMs dey face to complete their registration. We regret di wahala and we dey work round di clock to make sure say everybody fit register without stress.”
She add say di registration wey suppose close on Sunday, November 9, 2025, go now continue till midnight of Tuesday, November 11, 2025, so that all di people wey still dey struggle fit complete their form before time go finish.
NYSC also beg applicants to calm down as dem technical team dey work to fix di network problem.
Online registration for Batch ‘C’ bin start on Tuesday, November 4, and e cover both foreign-trained and locally-trained graduates.
NYSC management don assure say everything go balance soon so that PCMs fit enjoy smooth and easy registration before di new deadline reach.
