Member of House of Representatives wey dey represent Kiru/Bebeji Constituency for Kano State, Honourable Abdulmumin Jibrin, don officially waka comot from New Nigeria Peoples Party (NNPP) go join All Progressives Congress (APC) again.
Jibrin talk say him don fully support President Bola Ahmed Tinubu for him 2027 re-election bid.
The lawmaker announce him return on Sunday for him hometown Kofa, inside Bebeji Local Government Area of Kano, where thousands of supporters gather welcome am back to the APC family.
Over 2,000 Islamic clerics (Ulamas) come join the event do special prayers for President Tinubu make peace, progress and development full ground for Kano State and Nigeria.
Jibrin, wey dem expel from NNPP about two months ago because of alleged anti-party wahala and non-payment of dues, say him no get any bad belle for anybody as he thank the NNPP people for the time wey dem spend together.
“I thank my former party for their support, but time don reach to move forward. I believe say President Tinubu get the right vision for Nigeria, and I go support am with my full chest,” Jibrin talk.
He come beg all him supporters and followers make dem follow am join APC as the party prepare ground ahead of 2027 general elections.
People for the area talk say Jibrin return go strengthen APC power for Kano State as election don dey near small small.
