Minister of Solid Minerals Development, Dr. Dele Alake, don waka go London to ginger foreign investors with one $50 million lithium processing plant plus plenty ogbonge incentives like duty-free import for mining machines and easy profit repatriation.
Na im Special Adviser, Kehinde Bamigbetan, talk dis one for statement after Alake present Nigeria package for the Resourcing Tomorrow Exhibition and Conference.
Alake tell industry people say Nigeria don dey attract heavy money for minerals processing. He yarn say more than $2 billion don enter lithium and rare earth projects inside two years.
Accordin to am, na President Tinubu “value addition” policy make all this investment dey rush enter, to stop pit-to-port mineral export and promote local processing.
The Minister show examples: Canmax Technologies, Jiuling Lithium, Avatar New Energy Nigeria Ltd and Asba Group don put more than $1.3 billion inside lithium processing for Nigeria.
He add say one $50m lithium processing plant dey already under construction outside Abuja, with more industrial clusters set for Nasarawa, Kogi, Kwara and Ebonyi states.
Alake also talk about the $400 million rare earth processing plant by Hasetins Group wey dem launch November 19 this year.
To secure the sector, he remind investors say government don create Mining Marshals and dey use satellite monitoring to check illegal mining nationwide.
He still present the Nigeria Solid Minerals Company as government trusted partner for joint venture deals, using mineral assets wey dem inherit from the old Nigerian Mining Corporation.
