Nigeria Revenue Service (NRS) don say di replacement of di defunct Federal Inland Revenue Service (FIRS) go bring total overhaul to Nigeria revenue administration system.
Executive Chairman of NRS, Dr Zacch Adedeji, talk dis one during television interview wey journalists monitor from Abuja.
According to News Agency of Nigeria (NAN), di newly enacted tax reform laws don officially change di name and structure of di country top tax authority from FIRS to NRS.
Adedeji explain say NRS no be mere rebranding, but complete institutional upgrade wey go move Nigeria from scattered revenue administration to modern, digitalised, centralised and intelligence-driven system.
He say under di new framework, many tax and revenue functions wey dey scattered across different agencies don now combine under one system, with strong focus on data integration, automation and reduction of human interference.
Di NRS boss also dismiss allegations say government alter di tax reform laws after National Assembly pass dem.
According to am, only di officially gazetted Acts get legal authority and bind taxpayers and administrators.
“Law wey National Assembly pass no dey effective until President sign am and e gazette officially. Na di gazetted version be di final authority if any dispute arise,” Adedeji talk.
He add say revenue agencies, courts and taxpayers must follow only di gazetted law, no be draft bills, committee reports or debates for di chambers.
“Neither di executive nor di revenue authority get reason or legal power to alter di law after passage,” he insist.
Adedeji say di overhaul of NRS also support di Federal Government wider fiscal goals, as Nigeria dey try strengthen revenue generation.
According to am, Nigeria tax-to-GDP ratio don improve in recent years, reach about 13.5 per cent as at October 2025, but still dey below African average and levels of similar emerging economies.
He stress say di major aim of di reforms na to tax profits and returns, no be capital or investment.
“We no go tax poverty; na prosperity we wan tax,” Adedeji conclude.
