The Senate don carry out major reshuffle of some important standing committees, especially the ones wey concern national security, defence and planning, as insecurity matter dey rise for the country.
Senate Selection Committee wey Senate President Godswill Akpabio dey chair announce the changes during plenary on Tuesday.
For di new arrangement, Senator Yahaya Abdullahi from Kebbi State don become the new Chairman of the Committee on National Security and Intelligence. Before now, na him dey chair the Committee on National Planning.
Senate also shift things for the Committee on Livestock and Animal Husbandry as dem appoint Senator Shehu Buba from Bauchi State as the new chairman. Buba bin lose him former position last week when dem remove am as Chairman of the Security and Intelligence Committee.
Another shuffle see Senator Mustafa Musa from Yobe State take over as Chairman of the Committee on National Planning.
For the Air Force Committee, Senate Minority Whip, Senator Osita Ngwu from Enugu State don become Acting Chairman. Ngwu bin be deputy chairman before the former chairman, Senator Akwashiki, fall sick.
Senate leadership talk say the reshuffle na part of efforts to strengthen oversight work and make sure the legislature fit respond better to new security challenges wey dey show face for Nigeria.
