Senate President Godswill Akpabio and Deputy Speaker Benjamin Kalu don show strong support for di Reserved Seats Bill wey dey inside National Assembly, as dem talk say di bill go help increase women chance to enter political leadership for Nigeria.
Di two leaders yarn dis one on Monday during di opening ceremony of 2025 Law Week for International Federation of Women Lawyers (FIDA) Nigeria, Abuja branch. Di theme of di event na “Advancing Women’s Representation: Reserved Seats and the Future of Nigeria’s Legislature.”
Akpabio, wey Senator Idiat Oluranti represent, talk say di theme show how FIDA dey serious about gender equality and better representation for women. E remember how him mama raise am with discipline, dignity and resilience, and na why him no dey joke with issues wey concern women.
According to am, “Women strength no be backup strength. E dey from foundation. So anytime I fight for gender equality, na policy matter I dey pursue.”
For him keynote address, Deputy Speaker Kalu talk say Nigeria no fit continue to ignore di imbalance wey dey against women for politics. He point out say women make almost half of Nigeria population — 49.43 per cent according to NBS— yet dem no dey represented well for leadership positions.
Kalu assure say National Assembly go give di Reserved Seats Bill serious consideration as part of plan to balance representation and strengthen democracy.
