The National Youth Service Corps (NYSC) don announce say dem don release call-up numbers for di 2025 Batch C Prospective Corps Members.
For statement wey di scheme drop for dia official X handle on Tuesday, NYSC talk say di call-up numbers don come out “based on registration order.”
Dem come add say because of space wahala for orientation camps across di 36 states and Federal Capital Territory, only about 40 percent of people wey register go fit enter camp for di Batch C orientation programme.
For di ones wey no go fit enter this batch, NYSC assure dem say dem no go lose guard. “Those wey we no fit accommodate go automatically move to di next Batch wey go happen soon after di Batch C exercise,” di statement yarn.
NYSC management still promise say dem dey fully committed to make sure say everything for di orientation camp and service year go run smoothly for all di prospective corps members.
Online reports show say NYSC start online registration for di 2025 Batch C on November 4 and e go end November 9 for both foreign-trained and locally-trained graduates.
According to di scheme’s mobilisation timetable, pre-camp physical verification for foreign-trained graduates go happen from November 9 to 13, while ICT action go hold from November 12 to 15.
Di corps-producing schools go also help graduates print dia deployment letters and call-up letters between November 16 and 18.
