President Bola Tinubu don call African leaders make dem change di way dem dey handle mineral resources, say na time don reach for Africa to use im own money fund mineral sector and no dey wait for oyinbo capital again.
Tinubu, wey Vice President Kashim Shettima represent, yarn dis one for New York during di Africa Minerals Strategy Group (AMSG) High-Level Roundtable wey happen for di side of UN General Assembly.
According to am, Africa must waka together as one bloc if dem wan fit hold ground for global supply chain of mineral products like cobalt, lithium, graphite, gold and other rare resources.
“We must no dey export raw stones come dey import finished goods again. Make we build industries for Africa soil, and control di value chain,” Tinubu talk.
E still yan four key steps: climb value chain, own data (with new AMREC & PARC systems), government-led exploration, and bold laws wey go stop raw export like Zimbabwe, Gabon and Kenya don already do.
Nigeria Solid Minerals Minister, Dele Alake, plus Uganda’s AMSG Secretary-General Moses Michael Engadu, receive plenty praise from Tinubu as dem dey push Africa enter new mineral age.
UNDP Regional Director, Ahunna Eziakonwa, warn make Africa leaders shine eye because oyinbo dey rush Africa minerals anyhow. EU Commissioner Josef Sktkela still talk how Europe don already lock partnership with African nations under dia Critical Raw Materials Act.
Meanwhile, Shettima use chance hold talks with international investors, tell dem say Nigeria don enter new economic level under Tinubu’s reforms and say now na the best time to invest for Naija. E also meet Austria Chancellor Christian Stocker to build new ties.
