Na gobe for Enugu PDP as Gov Peter Mbah don plan move go APC with im full structure — from ward councillors reach National Assembly members.
APC caretaker chairman for the state, Dr Ben Nwoye, yarn this tori for Abuja during the inauguration of Enugu APC caretaker committee.
According to am, Mbah go officially join APC on Tuesday, October 14, 2024, and e no dey come alone — e dey carry 260 ward councillors, 24 state lawmakers, National Assembly members, and the full PDP state exco follow body.
Nwoye talk say, “Political evangelism don start. The governor don agree to move with us enter APC. He no dey come alone — he dey come with the whole Enugu PDP.”
APC national chairman, Prof Nentawe Yilwatda, hail the move as one big win for the ruling party and tell the new Enugu leaders make dem use the defection turn to lasting victory.
“APC na home for all. Our mission na to expand, win and deliver massive victory for 2027,” Yilwatda talk.
Deputy National Chairman (South), Emma Eneukwu, still add say the move mean say Southeast don regain im voice for Nigeria politics.
“With Enugu in APC, the Southeast don finally find im voice again,” he talk.
The defection don scatter PDP hold for Enugu and fit ginger more crossovers for Anambra and Abia before 2027.
Nwoye conclude say, “Where Enugu go, the Southeast go follow. Gov Mbah don change Enugu in two years, now e go use APC Renewed Hope Agenda move Southeast forward.”
